មនុស្សមួយចំនួនតែងតែមានបញ្ហាលំបាកនៅពេលពួកគេផ្ដល់មតិរិះគន់ក្នុងន័យស្ថាបនាទៅដល់អ្នកដ៏ទៃ ព្រោះមិនថាការរិះគន់ក្នុងន័យវិជ្ជមាន រឺការរិះគន់ក្នុងន័យស្ថាបនាតែងតែមានផលប៉ះពាល់ដល់អារម្មណ៍ទាំងចំពោះអ្នកទទួលនិងអ្នករិះគន់។ ការរិះគន់ក្នុងន័យស្ថាបនាគឺជារឿងមួយដែលល្អបំផុតសម្រាប់យើងទាំងអស់គ្នា ទោះជាយ៉ាងណាវានៅតែជាបញ្ហាចោទព្រោះក្នុងនោះមានពាក្យថារិះគន់។
ប្រសិនបើអ្នកប្រឈមមុខជាមួយបញ្ហានេះ យើងសូមណែនាំរបៀបនៃការនិយាយមួយចំនួនដែលអាចជួយឱ្យការផ្ដល់មតិរិះគន់របស់អ្នកទៅកាន់អ្នកដ៏ទៃវិញ ត្រូវបានបង្ហាញចេញក្នុងន័យកែលម្អ។
១. បង្ហាញពីអារម្មណ៍និងអាកប្បកិរិយាវិជ្ជមាន
រាល់ទឹកមុខ ពាក្យពេចន៍ និងអាកប្បកិរិយារបស់អ្នកទៅកាន់អ្នកដ៏ទៃគឺតែងតែប៉ះពាល់ខ្លាំងចំពោះអ្នកទាំងនោះ។ អ្នកគួរតែបង្ហាញចេញនូវរាល់សញ្ញាវិជ្ជមានទាំងឡាយ ដូចជាការញញឹម ឬការរួសរាយរាក់ទាក់ជាដើមទៅកាន់បុគ្គលដែលនឹងទទួលការរិះគន់ពីអ្នក ដើម្បីឱ្យពួកគេមានអារម្មណ៍ធូរស្រាល និងរីករាយជាមួយអ្នក ទោះបីជាពួកគេធ្វើបានល្អឬមិនបានល្អក៏ដោយ។
២. ត្រូវដឹងរាល់ការពិតទាក់ទងនឹងបុគ្គលដែលអ្នកត្រូវផ្ដល់ដំបូន្មាន
ដើម្បីងាយស្រួលក្នុងការឱ្យជាយោបល់ដែលមានប្រយោជន៍ទៅដល់អ្នកដ៏ទៃលើកិច្ចការផ្សេងៗ អ្នកគួរតែដឹងរាល់បញ្ហាពាក់ព័ន្ធនឹងចំណុចដែលត្រូវឱ្យអ្នករិះគន់នោះ។ ដូច្នេះ ដើម្បីកែលម្អចំណុចខ្វះចន្លោះរបស់គេ អ្នកត្រូវតែច្បាស់ថា គេមានកំហុសកន្លែងណា ដោយសារអ្វី និងមានផលប៉ះពាល់អ្វីខ្លះ ហើយនិយាយប្រាប់គេឱ្យបានច្បាស់លាស់ដើម្បីឱ្យគេអាចទទួលស្គាល់កំហុសខ្លួនដោយអស់ចិត្ត។
៣. ជំរុញទឹកចិត្តគេឱ្យដើរទៅមុខ
ជាទូទៅមុននឹងផ្ដល់យោបល់ទៅដល់អ្នកដ៏ទៃ យើងតែងតែមាននូវសំណួរមួយចំនួនដែលអ្នកឆ្ងល់ហើយចង់ដឹងពីពួកគេ ដូចជា “ហេតុអ្វីបានជាអ្នកធ្វើបែបនោះ?” ជាដើម។ ការពិតសំណួរទាំងនេះបានធ្វើឱ្យគេទទួលនូវសម្ពាធយ៉ាងខ្លាំង ដូច្នេះ អ្នកគួរជៀសវាងសំណួរទាំងនេះ ហើយព្យាយាមប្រើសំណួរណាដែលលើកទឹកចិត្តគេឱ្យគិតពីឱកាសទៅថ្ងៃក្រោយវិញ ដូចជាសំណួរ “តើអ្នកនឹងធ្វើដូចម្ដេចនៅលើកក្រោយទៀត ដើម្បីឱ្យអ្នកទទួលបាននូវលទ្ធផលល្អ? ”ជាដើម។
៤. បង្កើនទំនួលខុសត្រូវរបស់អ្នក
ការរិះគន់ក្នុងន័យស្ថាបនាគឺការបង្ហាញប្រាប់ផ្លូវជាក់លាក់និងសមរម្យមួយទៅដល់គេ ដើម្បីឱ្យប្រាកដថាគេនឹងកែប្រែវាបន្ទាប់ពីបានបទពិសោធន៍លើកនេះ។ អ្នកគួរគិតទុកមុនថាអ្នកនឹងណែនាំគេបែបណា ហើយដោយផ្អែកលើហេតុផលអ្វីខ្លះ ហេតុនេះនៅពេលដែលគេមិនច្បាស់ថាគេមានគំនិតកែប្រែចំណុចខ្វះខាតរបស់គេយ៉ាងដូចម្ដេចនោះ អ្នកអាចជួយបង្ហាញប្រាប់ពីយោបល់ល្អៗដែលអ្នកបានដឹងនិងធ្លាប់ជោគជ័យ។
៥. កុំសន្មត់អ្វីៗដោយខ្លួនឯង
មនុស្សជាច្រើនតែងយកអ្វីដែលពួកគេធ្លាប់បានដឹង បានឮ និងបានឃើញមកវិនិច្ឆ័យអ្វីដែលកើតឡើងក្រោយៗទៀត ហើយណែនាំពីអ្វីដែលគេគិតដោយខ្លួនឯងថាអាចបំពេញភាពខ្វះខាតរបស់អ្នកដែលចាំទទួលយោបល់របស់គេ។ ជាក់ស្ដែង ធាតុពិតការសន្មត់របស់យើងមិនអាចប្រាកដថាត្រឹមត្រូវនោះឡើយ យើងគួរចោទសួរទៅកាន់អ្នកដ៏ទៃថាតើអ្វីដែលយើងបានគិតនិងវិនិច្ឆ័យត្រឹមត្រូវឬទេ។
៦. បង្កើនចំណងទាក់ទងរបស់អ្នក
ជាធម្មតាមនុស្សតែងតែសប្បាយចិត្តនៅពេលដឹងថាមនុស្សដ៏ទៃរីករាយចំពោះវត្តមានរបស់ខ្លួនគេ។ អ្នកគួរតែនិយាយទៅកាន់គេឱ្យបានច្រើន មិនថា ការសរសើរនៅពេលគេធ្វើបានល្អ ការអបអរសាទរនៅពេលគេជោគជ័យ ឬការរិះគន់នៅពេលគេធ្វើខុស។ ការអនុវត្តបែបនេះនឹងជួយបង្កើនទាំងទំនាក់ទំនងរវាងអ្នកនិងមនុស្សដែលអ្នកកំពុងផ្តល់យោបល់អោយ។ ដោយការស្គាល់គ្នាច្បាស់រវាងគ្នាទៅវិញទៅមក គេនឹងរីករាយទទួលយកការរិះគន់របស់អ្នក។
៧. បង្ហាញពីការគាំទ្ររបស់អ្នក
អ្នកគួរបើកឱកាសឱ្យគេមើលឃើញថាអ្នកលើកទឹកចិត្តគ្រប់គ្នា គាំទ្រគ្រប់គ្នា ហេតុនេះអ្នកទាំងនោះនឹងមានទំនុកចិត្តថាគេអាចពិភាក្សាជាមួយអ្នកពីបញ្ហាផ្សេងៗ ហើយនិងមានអារម្មណ៍ស្និទ្ធស្នាលជាមួយអ្នក ដូចច្នេះរាល់មតិរិះគន់របស់អ្នកគឺសុទ្ធតែចង់ឱ្យពួកគេល្អ។
ជារួម គោលបំណងធំបំផុតរបស់ការរិះគន់ក្នុងន័យស្ថាបនា គឺដើម្បីកែលម្អរាល់ចំណុចខ្វះខាតរបស់អ្នករួមការងារ រួមគ្រួសារ រឺរួមក្រុម ដើម្បីអភិវឌ្ឍ រីកចម្រើន ឆ្ពោះទៅរកភាពជោគជ័យរួមគ្នា។
